Hirkan Milli parkı ölkəmizin ən gözəl canlılarıyla zəngin milli parkıdır. Əsası endemik  dəmir ağac meşələridir. Ərazinin bitki aləminin zənginliyi burada çoxsaylı heyvanların yaşamasına imkan yaratmışdır. Burada məməlilərdən bəbir, xallı maral, vaşaq, porsuq, çöl donuzu, cüyür, yenot və s. növlərə rast gəlmək olar. Ərazidə suda-quruda yaşayan heyvan növlərindən adi triton, daraqlı triton, Suriya sarımsaqiyli qurbağası, Qafqaz xaçlıcası, adi quru qurbağası yayılmışdır. Milli Parkın ərazisində sürünənlərdən Aralıq dənizi tısbağası, zolaqlı çılpaqgöz kərtənkələ, girdəbaş yovşanlıq kərtənkələsi, xarabalıq kələzi, Eskulap ilanı və s. növlər mövcuddur.

Hirkan meşələrin dərinliklərində məskən salmış işiqsız və maşın yolu olmayan kəndlərə səfər edəcəyik. Kəndlərin əhalisi talışlardır. Əsas məşğuliyyəti arıçılıq və heyvandarlıqdır. Dilmədi kəndi yaxınlığında tarixi qəbirstanlıq vardır. Yaşayışın çətinliyi ilə əlaqədar əhalinin bir hissəsi aşağı kəndlərə yerləşməyə başlamışdır.

Bəndəsər kəndindən Başlayan yolumuz Çayağzı, Dilmədi kəndlərini keçərək Siov kəndində tamamlanacaqdır. Gecəni Siov kəndində evdə qalacağıq. Talış mətbəxtinə uyğun kənd yeməkləriylə qidalanacağıq.Səhər yeməyindən sonra Sım kəndinə yola düşəcəyik. Sım kəndini gəzib , turumuzu Sım şəlaləsində bitirəcəyik.