Bu tur sizi Qafqaz dağlarının cənub-şərq yamaclarında yerləşən, qədim tarixi və sənətkarlığı ilə tanınan Lahıc qəsəbəsindən başlayaraq, Niyaldağ silsiləsini aşaraq, füsunkar mənzərələr içərisində yerləşən Mücü kəndinə aparır. Hiking 1215 metr yüksəklikdə yerləşən Lahıc qəsəbəsindən start götürür və 2000 metr hündürlüyə qədər qalxaraq Lahıc–Mücü aşırımı ilə davam edir. Bu mərhələdə iştirakçılar sıx meşəliklər, təmiz hava və dağ mənzərələri ilə əhatə olunmuş təbiət yürüşünün dadını çıxaracaqlar.
Yol boyunca palıd və vələs ağaclarının kölgəsində irəliləyərək, Fit dağı ilə Niyaldağ silsiləsinin qovşağında yerləşən, 1154 metr yüksəklikdə yerləşən Mücü kəndinə çatacağıq. Kənd həm təbii gözəlliyi, həm də tarixi zənginliyi ilə seçilir. Albaniya, Şirvanşahlar və Şirvan xanlığı dövrlərindən izlər daşıyan kənddə yəhudi qəbirstanlığı da daxil olmaqla maraqlı mədəniyyət nümunələri mövcuddur.
Tur orta çətinlik səviyyəsindədir və əsasən dağlıq, meşəlik və enişli-yoxuşlu yollarla irəliləyir. Ümumi yürüş məsafəsi təxminən 12–14 km-dir və 6-8 saat çəkir. Fiziki aktivliyi sevənlər, tarixi yerlərlə maraqlananlar və təbiət qoynunda vaxt keçirmək istəyənlər üçün ideal seçimdir.
Siz də bu unikal yürüşdə iştirak etməklə həm Azərbaycanın dağ təbiətini yaxından tanıyacaq, həm də əsrlərlə yaşı olan kəndlərin həyatına şahid olacaqsınız.
